Aku Bukan Budak Minang, Aku Budak Pulau Pinang...

"Ambo nok sabung kesoh dighi sendighi
Doh adik kakok kapung pakak nok denga lagi..."

Sekali Halim Yazid Diri Ambo (Bangkit Asal) 2 la pulak. Tu intro jo baghu tu, bukan eh apo, dah ghamai bonar tanyo kek den bilo laie nak update blog ni hah, den memang pantang dicabar punyo, apo laie. Kigho-kigho bahaso den kali ni lobih kughang maso Ito duet dongan Mat Glamour lagu Lamo Tok Jupo la. Soghang Kelate soghang Nogoghi, ambik kau.

Kali ni ese cumo nak cito kek kau pasal advencer ese ke kampung bang bil. Advencer den biaso la, tak lain tak bukan poie buek siasatan la, nak tengok botul ko tidak cagho dioghang tu, kalau dioghang sosat jalan, nak yo den sughuh dioghang balik kek pangkal jalan. Nak pesan kek dioghang jangan pilih jalan hitam la sonang cito. Eh, macam cito anak usop selam pun ado (apo, ekau tak pueh hati ko, kang den hontak dongan helmet ni kang sajo yo).

Tongah haghi tu (biaso la, mesti la tongah paneh, nasib baik den tak motong gotah), eden boghonti rehat pukul 12 suku. Humang ai, apo copek bonar, monteng ko? Monteng abah kau, dah haghi Jumaat, sapo lak nak tunggu laie, ado yang balik ambik anak, ado yang poie melantak. Eden dengan drebar biaso la, jalan kaki yo poie Masjid Nogoghi ke sanum jalan. Sampai yo den kek situ, omak ai, kocik yo masjid, Masjid Nogoghi Pulau Pinang bosar laie.

Kek dopan pintu masjid tu ado soghang dongan baju melayu siap dongan songkok samping bagai. Ado karpet meghah lak tu. Eden dah syak dah, ini tak lain tak bukan mesti ado VVIP tughun ni. Eden ghaso eden tau sapo.

Dah solosai sembahyang sunat apo semua, tongah rileks-rileks ontok-ontok, sokali nun jauh kek pintu dopan dah sampai ha VVIP yang semuo oghang bosar-bosar tunggu sikit punyo lamo. Sapo laie, Yamtuan Bosar la, serius yo muko dio, tapi eden nampak cagho dio salam dengan oghang memang mesro alam la den cakap kek kau, takdo la macam oghang lain, takat hulur tangan yo. Yamtuan Bosar ni memang pogang tangan botul-botul, siap taghik tangan dio sendighi dokek dado lopeh salam macam oghang kito biaso buek. Patut la dioghang baco Yasin maso dio confirm naik takhto. Sobab dioghang ghaso cagho dio dokek kek ati. Sobab-sobab lain dioghang tau sendighi la, maleh den nak cito. Cumo pendek kato dioghang ghaso pueh hati.

Khutbah haghi tu tajuk dio, "Kasih Sayang Pupuk Kesejahteraan Ummah". Eden tulih kek bolakang resit dobi warno meghah. Antaro cito eh pasal kucing dongan ular buto oleh Malik bin Dinar. Kucing tu sambar daging kek tangan Malik bin Dinar, lopeh tu campak kek dalam lubang yang ado ular buto tu. Ado cerito pasal proses peralihan saf kepimpinan. Ado cerito pasal peristiwo ponting kek Nogoghi Sombilan, penghargaan dan menjunjung kasih kek Tuanku Ampuan Besar Aishah.

Dalam banyak-banyak cito tu, den paling suko kek doa khutbah. Tingat dengan doa macam Ustaz Mat Masjid Daerah Jawi selalu baco, bunyi macam sajak pun ado. Antaro kandungan doa tu, "...kitab Al-Quran dan hadis nabi akhir zaman". Ado pulak disobut malayuwiyyah, yang ni den paham makno eh melayu la. Ado pulak den dongar macam amanuniyyah, yang ni ontah la camno den nak kato, bunyi eh satu macam lak ai. Tapi kalau botul pun takdo la den heghan bonar, biaso la tu, kek mano bumi dipijak, kek situ eh langit dijunjung. Samo la macam doa khutbah yang den dongar kek Masjid UIA Petaling Jayo, "...sebagai negeri yang maju, sejahtera dan berkebajikan...".

Dah solosai sembahyang, den peteng daghi jauh yo lah Yamtuan Bosar berangkat balik. Sopanjang laluan keluar masjid tu ghamai jugak jemaah termasuk imam, siak bagai angkat sombah dan salam dongan dio. Terharu jugak den tengok adegan camtu. Bukan eh apo, kek sotongah nogoghi tu keto ghajo pun kono ketuk. Dah la tu, ado pulak yang tolontang kek tongah jalan rayo. Boseit dongan tali pinggang yo lain kali dioghang tu, baghu padan eh muko. Bingai bonar.

Potang tu dah solosai meeting, si ketuo jabatan pun buek ghamah tanyo den bujang lagi ko. Maso ni teringat den cito cikgu Shidi kek Kolej MAS maso dio praktikal kek mano ntah, camtu la lobih kughang lawak yang dio kono. Sbona eh den maleh nak layan bondo-bondo bingai macam tu, tapi dah kek tompek oghang, layan yo lah. Ado pulak assistant kepado ketuo jabatan tu buek lawak ompong pasal suku-suku ni. Den sonyum yo, padahal dalam hati bukan eh den suko lawak spesies lahabau camtu. Woi bungko, mulut puako botul la kau, nak kono sosah ko?



17 April 2009 (Jumaat)
Darul Khusus